അഭയ

പഠന മുറിയില്‍നിന്ന്‌

അടുക്കളയിലേക്കുള്ള ദൂരം ,

അടുക്കളയില്‍ നിന്ന്‌ ,

കിണറിലേക്കുള്ള ദൂരം -

ഇവ അളന്നു തിട്ടപ്പെടുത്തിയാല്‍

പിന്നെ ഒരു ഡമ്മിയുണ്ടാക്കണം

ദുരൂഹതയുടെ ആഴങ്ങളിലേക്ക്

ചന്ദ്രന്‍ പോലും വീണെത്താത്ത

കിണറിലെ ദുഷിച്ച ഇരുട്ടിലേക്ക്

അതിനെ വലിച്ചെറിയണം.

എല്ലാം കഴിഞ്ഞു .

പട്ടികള്‍ക്ക് കൂട്ടില്‍ തിരിച്ചു പോകാം

വെളുത്ത സ്രാവുകള്‍ക്ക്

മദജലത്തില്‍ പുതിയ മീനുകള്‍ തിരയാം

ഒരായുസ്സിന്‍ടെ മെഴുകുതിരികള്‍

സത്യത്തിന്റെ കുഴിമാടത്തില്‍

കൊണ്ടുവച്ച് സ്വയമെരിഞ്ഞ

ഒരു മകളുടെ അച്ഛന്

ഇതാ കറവ വറ്റി

അറവ്ശാലയിലേക്ക് തെളിക്കപ്പെട്ട

ഒരു പാവം വാക്ക്‌

നീതി !!!